Mary-Kate and Ashley

Alam mo ba ang unspoken rules ng ethics, ha ate???? Hindi por que bumibili ako sa iyo ng barbecue every two weeks sa loob ng tatlong taon ay close na tayo. At hindi por que nakabuklat sa pahina ng mga push-up bra ang so-yesterday na catalogue mo ng Avon eh may balak na kaming umorder sa iyo ng padding pampalaki ng future. At hindi mo ba napansin na hindi ako yung nakikiusi sa catalogue mo na pagkamahal-mahal ng mga paninda? Dalawang bagay lang yun ate: una, hindi ako interesado at pangawala, hindi ako interesado. Pakialam mo ba kung man-boobs lang ang meron ako? Hindi naman ikaw ang malulugi. Hayaan mo nang problemahin yun ng hahawak (starts with the letter B … boy! ).

Kung tumigil ka na sana sa mga katagang: “Kailangan mo ng push-up bra“, baka nag-charity work pa ako at bumili sa iyo – pero hinde! Hindi ka pa nakuntento sa pagturo sa dibdib ko (or to the lack thereof) at kailangan mo pa talagang dagdagan ng “walang-wala o, parang bata” ang pangaalipusta mo. Kumbaga sa pang-aapak, tinalun-talunan mo pa ko. Sa pagkakatanda ko, hindi naman ako kailanman nagpanggap na malaki ang future ko o nameke ng cleavage sa pamamagitan ng make-up. At kung sa inaakala mong kailangan ko ng boobs para mang-akit ng lalake, pwes nagkakamali ka dahil hindi lahat ng lalake eh naghahanap ng malaking boobs. Meron ding tumitingin sa ano… sa mukha! Alam kong walang pagkakaiba ang front at side view ko pero may  face value naman ako kahit 0.001% at isa pa… wala ka namang alam kung gaano ako kagaling magmasahe no! Bakit? Si Katie Holmes nga may Tom Cruise, ikaw? Sinong sa iyo?

Siguro yan ang epekto ng nauusukan ang utak sa loob ng ilang dekada sa pagiihaw ng barbecue. Hindi naman sa ipinapamukha ko sa iyo na inamag ka na diyan sa ginagawa mo, pero kung yan ang naiisip mo eh wala na akong magagawa. Ang punto ko lang eh wala sa laki yan - nasa performance. Aber, at least hindi ako mahihirapang magjogging sa umaga, mahihiyang mag-two piece dahil mukha akong suman sa ibus na naguumapaw o matakot sa breast-crusher este mammogram.

Sayang. If looks could kill, dadalaw na sana ako sa lamay mo. Consider yourself lucky. Pasalamat ka ate barbecue, mabait akong tao – pero nagtatanim ako ng galit kaya sorry na lang. I may be flat but my head and wallet aren’t. Tse!

Tags: anger management, ego trip